කෝවිඩ් ව්‍යාප්තිය වැළැක්වීමට සති තුනක කාලයක් රට වසා තබන්නැයි ජනාධිපතිවරයාට ලිපියක් යවා එය මාධ්‍යය ලබාදුන් පොදුජන පෙරමුණ නියෝජනය කරන පක්ශ නායකයන්ට අගමැති මහින්ද රාජපක්ශ මහතා අද (23දා) පැවති කැබිනට් රැස්වීමේදී දැඩිසේ අවවාද කර තිබේ.
රට නොවසා සිටින්නට කැබිනට් මණඩලයේදී එකග වී එළියට ගොස් විරෝධය පළකිරීම සුදුසු නොවන බවද අගමැතිවරයා පවසා ඇත.
“විරුද්ධ නම් කට වහන් ඉන්නෙ නැතුව කැබිනට් එකේදි කියන්න තිබ්බනෙ” යැයි අගමැතිවරයා පවසා ඇති අතර ජනාධිපතිවරයාට ලිපියක් යැවීමේ වරදක් නැතත් එය මාධ්‍යයට ලබාදීම වරදක් බවත් අගමැතිවරයා පවසා තිබේ. මේ ආකරයෙන් කටයුතු කිරීමෙන් කැබිනට් මණ්ඩලයේදී කතා කිරීමට තරම් ප්‍රජාතන්ත්‍රවාදයක් නැතැයි ද ඇමතිවරුන්ගේ එකමුතුවක් නැතැයි ද ජනතාවට හිතෙන බවත් අගමැතිවරයා පවසා ඇත. මෙවර කැබිනට් රැස්වීමට ජනාධිපතිවරයා සහභාගී වී නැති අතර අගමැතිවරයාගේ ප්‍රධානත්වයෙන් රැස්වීම පැවැත්වී තිබේ.
